Хүүхдийнхээ гоц чадварыг багад нь хэрхэн нээж илрүүлэх вэ?
Хүүхэд бүр төрөлхийн өөрт заяагдсан гоц чадвартай байдаг. Энэ нь эцэг эхээс удамшиж ч болно. Гэвч үүнийг багад нь хэрхэн нээж илрүүлэх, хөгжүүлэхээс хамаарч, хүүхэд амжилтанд хүрэх эсэх нь шийдэгддэг.Ихэнх эцэг эхчүүд хүүхдийнхээ чадвар, авьяасыг хөгжүүлж, нээдэггүй. Харин та ямар ээж, аав бэ?
Хамгийн гол нь та хүүхдээ сайтар ажиглаж, тоглож байгааг нь хүртэл анзаарах хэрэгтэй. Хүүхэд бүрт өөрт төрмөл заяагдсан дараах чадваруудтай байдаг. Үүнд:
1. Маш сайн ой тогтоолттой
Таны хэлсэн зүйлсийг огтхон ч мартахгүйгээр маш сайн цээжилж байвал, таны хүүхэд маш сайн ой тогтоолттой байж болох юм. Иймд та дуу, шүлэг, тоог цээжлүүлээд нэг үзээрэй. Хэрэв энэ бүгдийг торохгүй цээжилж байвал та хүүхдээ оюун ухааны спортоор хичээллүүлж болох шүү дээ.
2. Ном унших дуртай
Төрөлхийн номонд дуртай байх нь ч мөн хүүхдийн тань авъяас гэдгийг та санаарай. Иймд хэрэв таны хүүхэд ном унших дуртай бол, хүүхдийн хүсэл сонирхлыг багаас нь хөгжүүлэх хэрэгтэй.
3. Үгийн баялаг сайтай, уран уншлагатай
Хэрэв таны хүүхэд маш жаахнаасаа л нарийн нандин сайхан үгсийг торохгүй хэлж, шүлэг уран зохиолыг урнаар уянгалуулан уншдаг бол таны хүүхэд энэ төрлийн авъяастай байж мэдэх юм.
4. Төсөөлөн бодох, ургуулах чадвар сайн
Энэ нь магадгүй танд нэг их чадвар мэт санагдахгүй боловч, таны санаж байгаагаас ч илүү чухал чадваруудын нэг байж мэдэх юм. Тус чадвараа сайтар хөгжүүлж чадвал таны хүүхэд зохион бүтээх, загвар, шинэ санаа гаргах зэрэгт гойд болох юм.
5. Тооцоолох чадвар сайн
Ямарваа зүйлийн учир зүйг олохдоо сайн, тооцоолон бодохдоо сайн бол таны хүүхэд бичиг цаасны ажилд илүү тохиромжтой байж болно. Иймээс багаас нь тэр талын мэдлэг, чадварыг нь хөгжүүлвэл зохино.
6. Урлаг соёлын авъяас
Хүүхэд багаасаа дуулж, бүжиглэх, олон нийтийн арга хэмжээнд оролцох дуртай, нийтэч нэгэн бол бол та хүүхдээ ямар нэг бүжиг эсвэл жүжгийн дугуйланд нэг бүртгүүлээд үзээрэй.
7. Маш хичээнгүй нямбай, бүтээлч
Зураг зурах, тоглоом тоглохдоо ч маш хичээнгүй, бүтээлч байдаг бол таны хүүхэд энэ төрөлд илүү авъяастай байж болох юм. Тус төрлийн чадвар нь хүүхдийг аль ч салбар, чиглэлд ажиллахад амжилттай байх болно.
