Таны гал тогоог инстаграм зураг шиг чамин тансаг болгох жижиг өөрчлөлтүүд

Гал тогоо бол айл гэрийн амин сүнс. Гэр бүлийн гишүүд ихэнх цагаа энд өнгөрүүлдэг. Харин гал тогоо нь замбараагүй, тохижилт нь буруу байгаа тохиолдолд хүн хоол идэх, хоол хийхдээ сэтгэл тавгүйтэж, таагүй мэдрэмж, сөрөг энергийг эндээс авдаг байна. Тиймээс гал тогоогоо илүү цэгцтэй, зөв болгох аргуудыг та бүхэндээ хуваалцахаар бэлтгэлээ.

Нэг загварын аяга таваг хэрэглэ

Энд тэндээс цуглуулсан, өнгө өнгийн, өөр өөр загвар бүхий аяга таваг хэрэглэхээс зайлсхий. Энэ нь ямар ч гоё ганган гал тогоог хямдхан, замбараагүй харагдуулах аюултай билээ. Тиймээс үргэлж ком аяга, таваг худалдан авч хэрэглэж байгаарай. Гал тогооны тавилга, ширээтэй зохицох комыг сайтар судалж үзсэний эцэст авахыг зөвлөж байна.

Гал тогооны алчуурны өнгө маш чухал

Цаг ямагт ашиглаж байдаг гал тогооны алчуур тань ямар өнгөтэй вэ? Хүмүүс тоодоггүй ч гэлээ, алчуурны өнгө хүртэл интерьерийн нэгээхэн хэсэг болдог учир тоохгүй орхиж болохгүй. Гал тогооны алчуур нь цайвар, завсрын өнгөтэй байхад илүү тохиромжтой.

Гал тогооны угаалтуур

Гал тогооны угаалтуурыг төмрөөрөө, мөнгөлөг өнгөтэй байлгахаас хүмүүс татгалзах болжээ. Энэ нь мөн л харагдах байдалтай холбоотой. Орчин үеийн залуус гал тогооны тавилганы өнгө, загвартай хослуулж ихэвчлэн цагаан эсвэл зэс өнгөтэй угаалтуурыг сонгох болсон байна.

Аяга таваг угаагч бодис

Аяга таваг угаагч бодис, цэвэрлэгч зэргийг угаалтуур тойруулаад тавьж болохгүй. Энэ нь ёстой л бохир, замбараагүй харагдуулна. Харин эдгээрийг хийж тавьдаг хос савнууд гэж байх аж. Аяга таваг угаагч шингэн зэргээ эдгээр саванд юүлж хийгээд тавихад илүү цэвэрхэн харагдана.

Гал тогооны шилэн шүүгээ

Гал тогооны шилэн шүүгээндээ маш цэвэрхэн хөшиг хийж өгөөрэй. Энэ нь аяга таваг, бусад зүйлсийг хүний нүднээс нуух төдийгүй илүү орчин үеийн, классик харагдуулна. Мөн гал тогоонд дулаан уур амьсгал нэмдэг байна.

Нэг өнгөөр дагнах

Өнгө өнгийн зүйлс гал тогооны шүүгээн дээр өрөөд тавьж болохгүй. Зарим зүйлсийн өнгийг тохируулах хэрэгтэй тул шинээр худалдан авч байгаа цахилгаан хэрэгслийнхээ өнгийг хүртэл бодолцох шаардлагатай.

Эмх цэгцтэй байдал

Энд тэнд хөглөрсөн зүйлс байлгахаас сэргийлээрэй. Жижиг савтай зүйлс, уут зэргийг цэвэрхэн хайрцагт хийгээд хадгалах хэрэгтэй.

Гал тогооны өрөөндөө шинэхэн цэцгээр өнгө нэм

Цэцэг нь өөрөө маш их ид шидтэй. Өрөөг дулаахан, тухтай уур амьсгалтай болгох төдийгүй орж ирсэн хүн бүрт таатай мэдрэмж төрүүлнэ. Тиймээс эзэгтэй та гал тогооны ширээн дээрээ цэцэг тавихаа мартуузай.