Өдөржин компьютерийн ард сууж ажилладаг хүмүүсийн өдөр тутамдаа хийх ёстой хялбархан, хөнгөн дасгалууд

Өдрийн талыг компьютерийн ард сууж өнгөрүүлдэг хүмүүс маш олон. Энэ нь тэдний ажил учраас яах ч аргагүй. Гэхдээ хэрэв та өөртөө, биедээ хайртай бол олон цагаар компьютерийн ард суусны дараа хялбархан басхүү хөнгөн дасгал хийж байгаарай. Ямар дасгал, яаж хийхээ мэдэхгүй байвал бидний бэлтгэсэн мэдээллийг сонирхоорой.

Амьсгалын дасгал хийх

Гүнзгий амьсгал авах нь зүрхний цохилтыг удаашруулж, цусны даралтыг бууруулж, биеийг тайвшруулахад тусалдаг. Мөн энэ нь оюуны санааны амралт болж, стрессийг бууруулж, анхаарлаа төвлөрүүлэх боломжийг олгодог.

• Тухтай сандал дээр сууж, хөлөө бүтэн улаар нь гишгэнэ. Нуруугаа цэх байлгаж, мөрөө сулла.
• Нүдээ аниад амьсгалахад бэлд: эрхий хуруугаараа баруун хамрын нүхийг хааж, зүүн хамрын нүхээр амьсгална.
• Хамрын зүүн нүхийг ядам хуруугаараа хааж, амьсгалаа богино хугацаанд барина.
• Баруун хамрын нүхэн дээрээс эрхий хуруугаа аваад амьсгалаа аажуухан гаргана.
• Дараа нь баруун хамрын нүхээр амьсгал аваад, эрхий хуруугаараа таглаж, зүүн хамраар амьсгалаа гаргаарай.
• Та илүү төвлөрч, тайвшрах хүртлээ хэдэн ч удаа давтаж хийсэн болно.

Хүзүүгээ эргүүлэх

Хамаг бие тань чилж ядарсан бол хүзүүгээ эргүүлэх дасгал хийгээрэй. Цэх сууж байгаад хүзүүгээ баруун, хойд, зүүн, урагш гээд дөрвөн тийш эргүүлж хөдөлгөнө.

Нуруугаа эргүүлэх

Нуруугаа сунгаж хөдөлгөх нь суудлын мэдрэл болон нурууны өвдөлтийг намдаахад тусална.

• Бие болон ширээний хооронд хангалттай зай байгаа эсэхийг шалгаарай. Сандал дээрээ хажуу тийш харж суугаад, хөлөө бүтэн улаараа газар хүргэнэ.
• Цэх сууж, нуруугаа нэг тал руу нь эргүүлж, гараа сандлын түшлэгт хүргээрэй. 5 секундын турш байрлалаа хадгалаад, эргээд эхний байрлалд очно.
• Нөгөө талдаа адил хийнэ.
• Тус бүр хоёр удаа хийгээрэй.

Муур/үхрийн байрлалаар нуруугаа сунгах

Энэ бол хүзүү, нурууны булчинг бэхжүүлж, сунгах замаар биеийн ядаргааг тайлж амраадаг дасгал юм.

Шалан дээр хийх:

• Дөрвөн хөллөж, байрлалаа ав.
• Амьсгал авахдаа гэдсээ татаж, нуруугаа хотойлгоно. Толгойгоо мөн дээш харуулаарай.
• Амьсгалаа гаргахдаа нуруугаа бөхийлгөж, толгойгоо доош харуулна.
• 5 удаа давтаж хийнэ.

Ширээн дээр хийх:

• Тэгшхэн сууна.
• Гараа өвдгөн дээрээ тавиарай.
• Амьсгалаа аваад нуруугаа хотойлгож, тааз руу ширтэнэ.
• Дараа нь амьсгалаа гаргаж, нуруугаа бөхийлгөж, толгойгоо цээжиндээ наана.
• 5 удаа давтаж хийнэ.

Зогсож буй тагтаа

Энэ нь нуруу, ташааны булчинг сунгах дасгалыг хослуулсан дасгал юм.

• Ширээнийхээ өмнө зогсож бэлдээрэй.
• Зүүн өвдгөө нугалж, ширээн дээр гаргаж тавьна.
• Биеийн дээд хэсгийг бөхийлгөж, ширээн дээр байрлуулна.
• Толгойгоо ширээн дээр эсвэл алган дээрээ тавьж амраана.
• Энэ байрлалаа 15 секунд бариад нөгөө хөл дээрээ давтана.

Биеэ сунгах байрлал

Энэ поз нь сандал дээр удаан суусны дараа таны түнхний үений хөшүүн байдлыг багасгахад үр дүнтэй.

• Хоёр өвдгөө нугалж суугаад, улаа нийлүүлнэ.
• Хөлийн тавхайг биедээ аль болох ойртуулж, ямар нэгэн таагүй мэдрэмж төрүүлэхгүй байхыг анхаараарай.
• Нуруугаа бөхийлгөхгүй цэх сууж, хөлөө гараараа барина.
• Байрлалаа 20-30 секунд хадгалж, зөөлөн амьсгалж, амьсгалаа гаргана.

Бугуйгаа сунгах

Бугуйгаа амрааж байх нь чухал. Бид өөрсдөө ч анзаарахгүйгээр бугуйндаа хэт их ачаалал өгч, ядраадаг.

• Ширээнийхээ өмнө зогсоно.
• Гараа эргүүлж, ширээн дээр тавих буюу хуруунуудаа өөр рүүгээ харуулж байрлуулна.
• Гараа сунган ширээн дээр зөөлөн дар.
• Энэ байрлалыг хэдэн секунд барьсны дараа бугуйгаа эргүүлж амраана.

Урагшаа сунаж, нуруу амраах

Олон цаг ширээний ард суусны дараа заавал нуруугаа амрааж сунгаж байгаарай.

• Хөлөө нийлүүлж зогсоод гараа хажуудаа авна.
• Амьсгалаа гаргаж, биеийн дээд хэсгийг доошлуулж хоёр гараа хөлөндөө хүргэнэ.
• Нуруу тань бөгтийхгүй, цэх байх ёстойг анхаар.
• Байрлалаа хэдэн секунд хадгалж, тайван амьсгална.