Солонгос оддын хэзээ ч бусдад ярихыг хүсдэггүй хөшигний цаадах нууц амьдрал

“K-Pop” буюу “Korean Pop” хөгжмийн урсгал нь дэлхий дахинаа эрчээ аваад нилээдгүй олон жилийг өнгөрөөжээ. Өвөрмөц стиль, ялдамхан царайтай охид, залуус санаа зовоох зүйлс ганц ч үгүй мэтээр өхөөрдөм инээмсэглэн чадварлаг дуулж, бүждэг ч бидний нүднээс далд чухамхүү юу болж байдгийг тааж мэдэшгүй юм. Харин өнөөдөр та бүхэндээ Солонгос хамтлагуудын жирийн амьдрал болон олны танил болохын тулд юу юуг даван туулдгийг хүргэхээр шийдлээ.

2012 онд дуучин PSY “Gangnam Style” дуугаараа дэлхий нийтийг байлдан дагуулж, Youtube хуудсанд хамгийн их хандалттай клипээр шалгарч, “K-Pop” урсгалыг дэлхий дахинд таниулан, тэсрэлт хийсэн гэхэд болно. Тайзан дээр болон дэлгэцээр амжилт бүтээлийн оргилд яваа мэт харагдах авч үнэн хэрэгтээ тэдэнд тулгарах хэцүүхэн асуудлуудад ганц нэгээр тогтохгүй аж.

Төрөлхийн гайхалтай авьяастай байлаа гээд, энгийн хүнээс хэд дахин илүү тэсвэр тэвчээр, сэтгэлийн хат байхгүй бол тэд бүгд амжилтад хүрч чаддаггүй. Хэрэв дуучин болохыг хүсвэл царайлаг төрх, сайхан бие галбиртай, ерөнхийдөө гадаад үзэмжийн хувьд төгс байх шаардлагатай. Ийм учраас дуучдын 95% нь ямар нэг байдлаар гоо сайхны мэс засал хийлгэсэн байдаг.

Дэлхийд гоо сайхны мэс заслаараа тэргүүлдэг тус улсын хувьд энэ нь тийм ч сүртэй зүйл биш юм. Мэдээж нүүрээ өөрчлүүлж, мэс хүргэсний дараа олон жил гам барьж, өвдөлтөө тэвчиж явах, хэт наранд гарахгүй, ширүүн салхинд жиндэхгүй байх хэрэгтэй болдог.

Арай гэж хөөрхөн төрхтэй болоод одоо л нэг дуучин болох нь гэтэл төсөөлсөн шиг нь хялбар байна гэж үгүй. Нөр их тэвчээр, хөдөлмөр шаардагдана. Учир нь гэвэл Өмнөд Солонгост бүжиглэж чаддаггүй уран бүтээлч гэж нэгээхэн ч үгүй байдгийг та ч анзаараа биз. Бүжгийн авьяасгүй байсан ч өдрийн 13, 14 цаг ямар ч амралтгүй бэлдсээр, ур чадвар маруухан ч чамгүй бүжигчид болон өөрчлөгддөг аж.

Ийн өдөр шөнөгүй бэлтгэл хийж, хит уран бүтээл туурвиж, сая нэг “дуучин болж” олонд танигдана. Гэвч өөрийн хүслээр байж, эрх чөлөөтэй жаргалтай амьдарна гэдэг юу л бол… Хамтлагийг хариуцдаг продакшн, менежер тэдний үйл хөдлөл, өмсөх хувцас зэргийг үргэлж хянаж, хэцүүхэн байдалд оруулдаг юм. Юу өмсөж, зүүх, ямар ааш аяг гаргах, юу идэх, хэнтэй уулзаж болох, болохгүй гээд л бүгдийг нь зааж зааварлана. Тэд карьерийнхаа оргил үед яг л утсан хүүхэлдэй мэт амьдрах аж.

Охидын хамтлагийн 15 настай гишүүнд хэт задгай хувцас өмсгөн тайзан дээр гаргасан хэргээр шүүхэд дуудагдаж байсан продакшн ч бий. Тэдний ийн хэт задгай, хамаагүй хувцасласан байдал нь нийгэмд буруу үлгэр дууриал боллоо хэмээн үргэлж хэл ам дагуулдаг бөгөөд эцсийн буруутан нь хамтлагийн гишүүд л болж хувирах нь харамсалтай.

Хамтлагуудын шүтэн бишрэгчид ерөнхийдөө өсвөр насны охид байдаг бөгөөд тэдний төлөө амиа ч өгөхөөс буцахгүй болтлоо үнэнчээр шүтэн биширдэг аж. Хэрэв гудамжинд олны танил хүн явж байвал шүтэн бишрэгчид нь зүгээр явуулахгүй нь ойлгомжтой. Иймд дуучид нийгмээс тусгаарлагдан, үргэлж нуугдаж явах хэрэгтэй болдог байна.

Хүн л юм хойно хэн нэгэнд дурлаж, болзохыг хүсэвч, продакшнаасаа, менежерээсээ зөвшөөрөл авах хэрэгтэй болдог. Азаар тэд зөвшөөрч сая нэг бие биедээ ухаангүй дурласан хосууд болзож, зугаалж байгаад папарациудын дуранд өртвөл нэр хүнд нь унаж, амжилт нь хэд дахин багасна.

“Од” залуугийн шүтэн бишрэгчид дурлалт бүсгүйг нь элдэв янзаар харааж, олон нийтийн сүлжээгээр доромжлон, байх суух аргагүй болгох нь гэсэн энгийн л нэг үзэгдэл. Мэдээж тэрхүү бүсгүйд сайхан байхгүй нь ойлгомжтой тул хайр сэтгэлээ орхиход хүрдэг байна.

Мөн та санаж байгаа бол саяхан, хөвгүүдийн “EXO” хамтлагийн гишүүн Пак Чанёол өөрийн инстаграм хуудсаараа загвар өмсөгч үзэсгэлэнт охин Лили Мэй Макийг “Follow” хийн дагасан нь сонсогч фэнүүдийнх нь уур бухимдал, атаа хорслыг дээд цэгт нь хүргэсэн байдаг. Гэмгүй бүсгүй рүү хараалын үгтэй хэдэн мянган сэтгэгдэл ирж, түүнийг нилээдгүй бухимдуулаад авсан нь шуугиан тарьж байсан билээ.

Тэдний зовлонт амьдрал үүгээр үл дуусна. Үнэнч шүтэн бишрэгчид нь тэдэнд ухаанаа алдтал дурлаж, бүр гэр лүү нь дайрч орон, унтаж байхад нь үнсэх гэхчлэн бэлгийн дарамт учруулж байсан удаатай. Цаг ямагт л биеэ хэрхэн авч явах тал дээр анхаарч, ганц л буруу үйлдэл гаргавал тэр чигээрээ карьер нь дуусах ч аюултай байдаг юм.

Энэ мэтчилэн хэт дарамттай байсаар залхсан, өөрийгөө хэн гэдгээ ч ойлгохоо байсан дуучид амиа хорлох тохиолдол ч ихээр гардаг байна. Харин тэдний шүтэн бишрэгчид сэтгэлээр унан, гаслан шаналж, тэр бүү хэл хамт диваажинд очно хэмээгээд амиа хорлох тохиолдол ч бий аж.

Фэйсбүүк сэтгэгдэл
error: Мэдээлэл хамгаалагдсан !!